zamin hacı

HAMAM 

Hər gün əllərimi yuyuram, gözəl,

Tapmaq istəyirəm,

ömrün tozunda

itmiş taleyimin naxışlarını.

Hər gün gözlərimi yuyuram, gözəl,

Tapmaq istəyirəm baxışlarını. 

Hər gun ürəyimi yuyuram, gözəl,

Axir ürəyimin qanı beləcə;

Mənim ürəyimin qanıdır – axır,

Sənin boylandıgın qaranlıq gecə. 

Hər gün dizlərimi yuyuram, gözəl,

Qaldırıb baxıram diz qapağımı.

Orda dolaq-dolaq yığılıb qalıb

Üstündə ağactək bitdiyim yollar.

Orda sızıldayır sənin ardınca

Süründüyüm yollar, getdiyim yollar. 

Gedib günahımı yuyaram sonra…

Beləydi o vaxtkı şərtimiz, gözəl.

Hər gün yuyunuram, sənin yanına

Təmiz dönəcəyəm, tərtəmiz, gözəl. 

Hər gün qulağımı yuyuram, gözəl,

Gəlir qulağıma cürbəcür səslər…

Aha, bu deyəsən sənin səsindi,

Gözlə, ürəyimi yuyub gəlirəm! 

…Eh, bəxtim gətirmir – su da kəsildi.  
 

CƏHƏNNƏMƏ GƏL 

Gözlədim yenə gəlmədin,

Gəlmirsən, cəhənnəmə gəl!

Ölümümü istəyirdin?!

Ölmüşəm, cəhənnəmə gəl. 

Orda soyuyurdum səndən –

Soyuq vurdu qanımı.

Gəlib nə istəyəcəkdin –

Soyuq aldı canımı. 

Soyuq apardı canımı,

Indi isti yerdəyəm.

Canim-gözüm, elə bilmə

Buz kimi qəbirdəyəm. 

Burnumun ucu göynəyir

Sənin soyuq sözünçün.

Salıblar qır qazanına

Buğlanıram özümçün. 

O dünyada olammadıq,

Kaş ki, burda bir olaq.

Ikimiz bir cəhənnəmdə,

Qazanımız dar ola. 

O dünyada qalsın hər şey,

Bura dərd-sərnən gəlmə.

Bura əqrəbnən doludu,

Gələndə yernən gəlmə. 

…Amma çox qarışıq yerdi –

Işin çətin olacaq.

Məni belə axtararsan:

“Cəhənnəm, İsti Bucaq” .